Electronic Beats
Në skenën e muzikës elektronike mungon shumë prezenca e femrave. Si në vendin tonë ashtu edhe në skenën botërore, dallohet që shumica e DJ dhe Producentëve janë meshkuj. Sigurisht që lufta për barazinë gjinore po jep frytet e veta dhe gjithmonë e më shumë po shtohen femrat që mbushin club-et dhe arenat e festivaleve. Në Shqipëri dhe Kosovë, DJ femra mund të numërohen me gishtat e një dore. Një nga këto DJ është pikërisht Oda Haliti, e njohur thjesht si DJ Oda. Performanca e saj e radhës do të jetë në eventin #perplazhin_cocktails, të organizuar nga Telekom Electronic Beats për rritjen e vetëdijesimit e ndotjes së plazheve. Nuk mund të lëmë pa përmendur faktin që ajo ka performuar në Berghain (jo vetëm club-i më i njohur ne Berlin por në të gjithë botën). Oda jo vetëm që është një DJ shumë e mirë dhe e pëlqyer por është dhe një aktiviste për të drejtat e njeriut, gjë që e bënë njeriun më të përshtatshëm për kauzën tonë. Për ta njohur pak më mirë vendosëm që t’i bënim disa pyetje.
- Si nisi rrugëtimi yt drejt Dj-ing?
Muzika më ka përcjellë që në fëmijëri. Miksimi si DJ për publikun më të gjerë ka filluar diku në vitin 2010 në lokalin tim të parë të quajtur “Gegë”.
- Cili është ndryshimi i publikut të Tiranës me atë të Prishtinës?
Hmmm nuk mendoj që ka ndonjë ndryshim shumë të theksuar publiku i Tiranës me të Prishtinës.
Kohët e fundit sa më shumë ture po bëj në Evropë, kam filluar të shoh ngjashmëri të publikut tim kudo. Në përgjithësi është po e njëjta energji. Mendoj se publiku në këtë rast i “Muzikës Elektronike” është kulturë më vete kudo nëpër botë.
- Ti je dhe një aktiviste për të drejtat e njeriut, si lidhen DJ-ing dhe aktivizmi?
Muzika është medium shumë i fuqishëm. Me muzikë protestoj akoma më shumë vitet e fundit. Atë që dua të them, e them përmes muzikës. Publiku është më i madh, dhe natyrisht ndikimi është përherë më i madh.
Është shumë mirë të dish të përdorësh muzikën për çështje/problematika sociale të nevojshme.
Më pëlqen të provokoj me muzikë tema të ndjeshme. Lumturohem kur arrij të jap ndonjë mesazh të fuqishëm përmes ndonjë track-u të veçantë në një moment të caktuar. Pasurohem kur krijoj komunikim/lidhje të sinqertë me publikun përmes muzikës.
- Na trego për eksperiencën tënde në Berghain. A e krahason dot me ndonjë event tjetër?
Përfundimisht eksperienca në Berghain ngelet si eksperienca më speciale përgjatë gjithë udhëtimit të karrierës time muzikore deri tani.
Eventet i kam problem t’i ndaj, secili event është eksperiencë e bukur në vete.
Por ajo që më ka dhënë kënaqësi të paskajshme në Berghain, përtej stresit të madh që kam pasur, ka qenë “Sound System” i tyre. Nuk më ka ndodh më herët të shijoj më shumë se atë natë të luaj muzikë diku që dëgjohet muzika aq pastër, me aq kualitet.
Ishte kënaqësi e paharrueshme të luaj në një skenë aq të rëndësishme si Berghain me zërim (fonia) Function-One, para një publiku të madh, të dashur e mbështetës.
Për çdo muzikant zërimi(fonia) ka rol kryesor në performancë. Më vjen keq që tek ne akoma është problematike zërimi(fonia) nëpër ngjarje kulturore.
- Një mesazh për të gjitha femrat që aspirojnë të bëhen DJ?
Nëse të tjerët nuk ju marrin seriozisht si DJ femër, ju merruni sinqerisht e seriozisht me muzikën tuaj!
Gjinia është likuid. Ashtu sikur se është miksimi në muzikë.
Ju presim në datë 28 korrik në Jal, për kauzën e radhës të #KETAJEMINE. Do të pastrojmë plazhin për një natyrë më të pastër dhe do të festojmë me Telekom Electronic Beats, Vlashent Sata dhe DJ Oda. https://bit.ly/2OgLnqe
